ASAN Radio xəbər verir ki, bu gün “Dövlət İdarəetmə Prinsipləri: Beynəlxalq təcrübə və inkişaf perspektivləri“ mövzusunda beynəlxalq konfrans keçirilib.

Konfransı giriş nitqi ilə açan Prezidentin İqtisadi İslahatlar üzrə Köməkçisi Xidmətinin sektor müdiri Elxan Mikayılov bildirib ki, Azərbaycanda qanunvericilik bazasının təkmilləşdirilməsi sahəsində ciddi işlər görülüb. O əlavə edib ki, Prezident İlham Əliyevin həyata keçirdiyi sistematik tədbirlərin qanunauyğun nəticəsi kimi, Azərbaycanda təkmil siyasi sistem bərqərar olub. Buna görə də ölkə başçısının tapşırılıqları siyasi islahatların iqtisadi islahatlarla paralel şəkildə aparılmasıdır. Bu istiqamətdə Prezidentin sərəncam və fərmanları, eləcə də qəbul olunmuş qanun layihələri atılan addımları daha da effektiv edib. Elxan Mikayılov həmçinin deyib ki, beynəlxalq qurumlarla əməkdaşlıq və təcrübə mübadiləsi fəaliyyətin səmərəliliyini artırır.

İqtisadi İslahatların Təhlili və Kommunikasiya Mərkəzinin İcraçı direktoru Vüsal Qasımlı bilidirib ki, Azərbaycanda dövlət idarəetməsi ilə bağlı islahatlar yeni iqtisadi paradiqmanın tələblərinə uyğun olaraq uğurla davam etdirilir: “Dövlətə məxsus müəssisələrin səmərəliliyinin qiymətləndirilməsi sahəsində tətbiq edilən və beynəlxalq təcrübədə tövsiyə edilən qabaqcıl qaydalar öyrənilib və Prezident Fərmanına uyğun olaraq tətbiq ediləcək. Dövlət müəssisələri üçün effektiv fəaliyyət üzrə uyğun mexanizmlər müəyyənləşdiriləcək. Bu sahədə dövlət idarəetməsi islahatları mərhələli şəkildə həyata keçiriləçək.” Dr. Qasımlı həmçinin əlavə edib ki, Milli iqtisadiyyatın strateji yol xəritəsi çərçivəsində də dövlət idarəetmə islahatlarının istiqamətləri müəyyənləşdirilib.

Milli Məclisin İqtisadi siyasət, sənaye və sahibkarlıq komitəsinin sədri, akademik Ziyad Səmədzadə Prezident İlham Əliyevin həyata keçirdiyi siyasətin nailiyyətləri sayəsində Azərbaycanın yeni mərhələyə qədəm qoyduğunu deyib. Akademik həmçinin əlavə edib ki, milli iqtisadiyyatımızın inkişafı istiqamətində hazırda sistemli islahatlar həyata keçirilir və bu islahatlar gələcək perspektivlər baxımından böyük əhəmiyyət kəsb edir. Buna görə də Azərbaycan dünyada layiqli yerini tutmağa müvəffəq olub.

Milli Məclisin deputatı Vüsal Hüseynov və ASAN xidmətin aparat rəhbəri Azad Cəfərli “Azərbaycanda cari islahatlar və potensial islahatlar üzrə əsas təmərküzləşmə sahələri” mövzusunda məruzə ediblər.  

Konfransda Prezident Administrasiyası, Nazirlər Kabineti, Milli Məclis, İqtisadiyyat və bir çox digər nazirliklərin, dövlət komitələri, administrasiyaları və agentliklərinin, həmçinin QHT-lərin nümayəndələri iştirak ediblər.