ASAN Radio xəbər verir ki, Fəvvarələr Meydanında "Nargiz Fund"un rəhbərliyi və Amapola Exclusive Events şirkətinin təşkilatçılığı ilə "Soyuq əllər, İsti ürək" Qış nağılı  adlı Xeyriyyə Yarmarkası davam edir.

Tədbirdə əsas məqsəd uşaq evlərində ağır xəstə olan uşaqlara yardımın təşkilində həmrəlik nümayiş etdirməkdir.

Bu il tədbir daha geniş formatda keçirilir və 2017-ci ilin 14 yanvar tarixinə kimi davam edəcək. Yarmarkada paytaxt sakinləri və qonaqları üçün yeni il bazarında müxtəlif hədiyyələr, suvenirlər, eləcə də qış rəmzi olan əşyaların satışı təşkil olunub.

Bu gün həmçinin 5 dekabr - Beynəlxalq Könüllülər günüdür.

Təşkilatçılar "Soyuq əllər, İsti ürək" Qış nağılı adlı Xeyriyyə Yarmarkasında böyük könüllülər komandasının əvəzolunmaz dəstəyini xüsusi vurğulayır. Xeyriyyə yarmarkasının sosial proqramı çərçivəsində "Asan məktub" xidmətinin könüllüləri tərəfindən "Ümid məktubu" adlı aksiya həyata keçirilir.

45 gün ərzində könüllər uşaq evlərini ziyarət edərək onlarla birlikdə “Ümid məktublarını” tərtib edəcəklər.

"Asan məktub" layihəsi bütün məktubları http://asanmektub.az/letter saytında yerləşdirərək hər bir insana bir uşağın arzusunu həyata keçirmək imkanı yaradacaq.

"Ümid məktubu" aksiyasının əsas çağırışı xəstə yaxud valideyndən məhrum olan uşaqların Azərbaycan cəmiyyətinə lazım olduqlarını hiss etdirməkdir.

Qeyd edək ki, Fəvvarələr meydanında “Nargis Fund”un təşkilatçılığı ilə dördüncü “Soyuq Əllər, İsti Ürək” xeyriyyə yarmarkası fevralın 3-dən öz işinə başlayıb. Fevralın 3-də yarmarkanın açılış mərasimi baş tutub.

Qeyd edək ki, bu il yarmarkanın təşkilində ASAN könüllüləri yaxından iştirak ediblər. ASAN könüllüləri Xeyriyyə Yarmarkasının qonaqlarına yarmarkadan səmərəli istifadə etməyə və tanış olmağa yardım göstəriblər.

Vurğulamaq lazımdır ki, ASAN Radio "Soyuq əllər, İsti ürək" Qış nağılı  adlı Xeyriyyə Yarmarkasının eksklüziv radio tərəfdaşıdır.