Dünyaşöhrətli müğənni, müstəsna səsə malik Azərbaycan vokal məktəbinin təkrarsız nümayəndələrindən biri Rəşid Behbudov 1915-ci il dekabrın 14-də Tiflisdə tanınmış Şuşalı xanəndə Məcid Behbudovun ailəsində dünyaya gəlib. Rəşidin anası isə Firuzə xanım Vəkilovlar nəslinə mənsub idi.

Uşaq yaşlarından məktəb xorunda oxuyan Rəşid 1933-cü ildə Dəmiryolu Texnikumuna daxil olur. Təhsili dövründə tələbə özfəaliyyət orkestrində çalışır. Hərbi xidməti zamanı ordu ansamblında solistlik edir. Həmin illərdə Tiflisdə “Teo-caz” adlı kiçik ansambl yaradır. Cəbhədə konsertlər verir. Bakıda qastrol səfərində olanda burada qalmaq qərarına gəlir.

1943-cü ilin sonunda Bakı kinostudiyasında Üzeyir Hacıbəyovun eyniadlı operettasının motivləri əsasında çəkilən "Arşın mal alan" filmində baş rola dəvət alır. 1945-ci ildə film efirə çıxır və çox tez bir zamanda nəinki Azərbaycanda, bütün Sovet İttifaqında böyük populyarlıq qazanır. 1946-cı ildə bu filmdəki Əsgər roluna görə Rəşid Behbudov "Stalin mükafatı" ilə təltif olunur.

1946-1956-cı illərdə Azərbaycan Dövlət Filarmoniyasının, 1953-1960-cı illərdə fasilələrlə Azərbaycan Dövlət Opera və Balet Teatrının, 1957-1959-cu illərdə Azərbaycan Dövlət Konsert Ansamblının təşkilatçısı və rəhbəri olur.

Çox keçmir Rəşid Behbudovla Tofiq Quliyevin sənət əlaqələri yaranır. Sonradan onun repertuarında Tofiq Quliyevin bəstələdiyi bir-birindən gözəl mahnılar yer alır.

R.Behbudovun Azərbaycan milli kinematoqrafiyasının inkişafında xidmətləri təkcə «Arşın mal alan» kinokomediyası ilə bitmir. O, həmçinin «Bəxtiyar» filmində, «1001-ci qastrol», «Doğma xalqımıza», «Toyda görüş», «Abşeron ritmləri» film-konsertlərində və filmlərdə çəkilir. «Bəxtiyar» filmi isə onun populyarlığının yeni dalğası olur.

1953-cü il dekabrın 25-də premyerası baş tutan «Sevil» operasında əsas qəhrəman Balaş rolu Rəşid Behbudova tapşırılır. Onun opera səhnəsində yaratdığı bu rol böyük uğur qazanır.

1966-cı ildə Rəşid Behbudov Azərbaycan Dövlət Mahnı Teatrını təşkil edir və ömrünün sonunadək onun solisti və bədii rəhbəri olur.

Argentina, Bolqarıstan, Belçika, Çili, Çin, Efiopiya, Finlandiya, Hindistan, İran, İraq, İtaliya, Misir, Türkiyə və s. ölkələrdə geniş repertuarla çıxış edən Rәşid Behbudov bir neçə il ərzində Azərbaycanı bütün dünyada tanıdır. Dahi sənətkar Rəşid Behbudov 1989-cu il iyunun 9-da vəfat edib.

Qeyd edək ki, 18 mart 2015-ci ildə Azərbaycan Prezidenti İlham Əliyev “Rəşid Behbudovun 100 illik yubileyinin keçirilməsi haqqında” Sərəncam imzalayıb.

ASAN Radio xəbər verir ki, bu gün saat 19:00-da Heydər Əliyev sarayında Mədəniyyət və Turizm Nazirliyinin təşkilatçılığı ilə Rəşid Behbudovun 100 illik yubileyinə həsr olunmuş möhtəşəm tədbir keçiriləcək.