ASAN Radio xəbər verir ki, Beynəlxalq Muğam Mərkəzində Yel çərşənbəsinə həsr olunmuş konsert kecirilib.

Konsertdə İrs folklor ansamblı çıxış edib. Ansamblın bədii rəhbəri əməkdar artist Nuriyyə Hüseynovadır. Tədbirin əvvəlində Novruz Novruzlu Dədə Qorqud obrazında tamaşaçıları salamlayıb və sonra əməkdar artist Nuriyyə Hüseynova musiqiçiləri təqdim edib.

Ansamblın solistləri Qənimet Sultan, Novruz Novruzlu, Solmaz Kosayeva, Aşur Adigözəlov və musiqiçilər Mikayıl Mikayılov tarda, İlkin Yaqubov bas tarda, Ceyhun Muradov kamançada, Cahandar Mikayılov bas kamança, Xəyal Cəbrayılov ud, Araz Fətəliyev balaban, Soltan Əliyev nağara, Eyvaz Həmidov davulda ifa ediblər.

Konsertden sonra Nuriyyə xanımla musahibəmizdə bildirib: "Biz çox xoşbəxtik ki, Beynəlxalq Muğam Mərkəzinin Novruz Çərşənbələri layihəsində Yel çərşənbəsi konsertini İrs folklor ansamblı ilə birgə keçirdik. Tamaşaçılara xalq mahnılarını, muğamlarımızı dinlətdik".

Beynəlxalq Muğam Mərkəzi öz tamaşaçılarına martin 9-u İncəsənət Universiteti ilə birgə "Bayatı-Şiraz dəstgahi" adlı konsert proqramı hazırlayıb. Klassik musiqi sevərləri isə 10 mart "Bahar Suitasi" adlı konsertinə dəvət edir. Novruz bayramına həsr olunan konsertlərsə hələ qarşıdadı. 24 mart "Bahar nəgməsi" adlı konsertdə də gözəl muğam ifaları ilə muğamsevərləri başına toplayacaq. Maraqlananlar Beynəlxalq Muğam Mərkəzinin rəsmi facebook səhifəsinə daxil olub məlumat ala bilərlər. Biletləri şəhərin kassalarında, ASAN xidmət mərkəzlərində və iticket.az saytinda əldə etmək olar.