ASAN Radio xəbər verir ki, bu gün saat 19:00-da Beynəlxalq Muğam Mərkəzində xanəndə Bülbülcanın 175 illiyinə həsr olunmuş yubiley gecəsi keçiriləcək.

Gecədə Azərbaycanın tanınmış xanəndə ustadları, ziyalılar, həmçinin Tiflisdən dəvət olunmuş mədəniyyət xadimləri iştirak edəcəklər.

Yubiley gecəsi Mədəniyyət və Turizm Nazirliyi tərəfindən təşkil olunub.

Beynəlxalq Muğam Mərkəzində baş tutacaq yubiley gecəsi 100 FM tezliyində yayımlanan ASAN Radioda canlı yayımlanacaq.

ASAN Radio xanəndə Bülbülcanın 175 illiyinə həsr olunmuş yubiley gecəsinin rəsmi informasiya tərəfdaşıdır.

Məlumat üçün:

Bülbülcan adıyla daha çox tanınan Əbdülbağı Zülalov Şuşada anadan olub. Hələ cavan yaşında Qafqazı və İranı gəzib öz istedadı və müxtəlif dillərdə muğam ifa etmə məharəti ilə muğamsevərlər arasında məşhurluq qazanıb. İran şahı Müzəffərəddin şah tərəfindən Şiri-Xurşid ordeninə layiq görülüb.

1875-ci ildən başlayaraq ömrünün 30 ilini Tbilisidə yaşayıb. Gürcü dilini öyrənib Azərbaycan muğamatlarını o dildə ifa edərdi və onu dinləyən Tbilisililəri mükəmməl səsi, yaraşıqlı xarici görünüşü və artistik davranışı ilə heyran edərdi. Tez-tez yaxın dostu və məşhur tarzən Sadıqcanla çıxış edərdi. 1905-ci ildə Bülbülcan Şuşaya qayıtdı və vaxtını yetim qalan qardaşı uşaqları Əli Zülalovun və Qəmbər Zülalovun böyütməsinə həsr edib.

1920-ci illərdən bəri Bakıda yeni açılmış ali musiqi məktəblərdə dərs deyib. 1929-cu ildə vəfat edib. Zülalov ailəsi bu günə qədər dahi xanəndənin musiqi ənənələrini davam edir. Bülbülcanın qızı, nəvəsi və qardaşı uşaqları da xanəndə olub.